الخميس، 10 أبريل 2008
الكحرتة الابدية (الجزء الرابع بعد الكحرتة)
الاول احب اطمنكم ع الدكتور00هما نقلوه قسم نفسية و عصبية "بيتعالج م الصدمة بتاعت المرة اللى فاتت" و ادوه اجازة لحد ما الغمة تنكشف"الواد و ابوه يطلعوا بالسلامة"هما انشاء الله هيطلعوا فى الجزء ده"مدير المستشفى حالف ليكسر وراهم زير"
طبعا الخناقات فضلت مستمرة كل ما الام او حد من اصحاب الواد ييجى يزوره 0 النهاردة شلضم و سيكا جم عشان يزوروا الواد00شلضم جاب للواد علبة شيكولاته من اياها"اللى معمولة بزيت عربيات00ارخص برضه"
-اتفضل يا سيدى00و عقبال العلقة الجاية
-انت هتفول من دلوقتى و لا ايه
-لا ابدا شلضم ميقصدش
-اسكت انت يا سيكا
-اخرس ياض منك ليه لاقوملكم
-بس يا عم بقى بطل دوشة شوية
-ماااااااااشى انا هوريك"يحاول يقوم فيقع ع الارض00الواد يضحك و شلضم يساعد الاب يرجع سريره"
الام تدخل00
-يلهوى ايه اللى حصلك يا خويا
-متقلقيش يا ماما ده بس كان بيعوم ف الترعة00"يضحك هو و سيكا"
-ماشى بس اما نطلع من هنا احلق دقنى ان دخلتك البيت تانى
-عاجبك كده يا سى شلضم؟
-يا عم انا كنت بهزر00مقصدش
-و لا يهمك هو اصلا مبيستحملش دقنه تطلع
-يعنى اعمل فيه ايه الواد ده
-معلش يا خويا00عيل و غلط
الدكتور يدخل00
-طيب نستاذن احنا بقى 00عن اذنكم
-سلام يا شلاضيمو00باى يا سيكو
-انتو الاتنين بقيتوا كويسين قوى و هتخرجوا ف حدود يومين
-لولولولولولولولولولولى"الام بتزرغط لتانى مرة"
-بس يا هانم00ميصحش كده00فى مرضى عايزين راحة
-معلش يا دكتور00اخرسى يا ولية و تعالى هنا
ــــــــــــــــــــــــــــــــــــــــــــــــــــــــــــــــــــــــــــــــــ
بعد يومين00
-خلاص انا كتبتلكم على خروج00"فيه ناس برة بيعلقوا زينة و لمض و بيحطوا علب هدايا"
-هو فيه ايه يا دكتور؟!
-و لا حاجة دى واحدة مريضه عيد ميلادها النهاردة و هتعمل حفلة
-اه00طيب00كل سنة و هى طيبة "يخرجوا من باب المستشفى"
"طرااااااااااااااااااااااااااخ" 00يبصوا وراهم000"الزير اتفشفش"
الأربعاء، 9 أبريل 2008
الكحرتة الابدية (الجزء الثالث بعد الكحرتة)
-عاجبك اللى حصل ده يعنى؟!
-يعنى هو انا اللى قلتلك تضربنى
-برضه مش عايز تتلم شكلى هضربك تانى
-تضربنى ايه بقى ده انت متلقح زى شوال البطاطس"عشان وارم من كل ناحية"
الام تدخل00
-سلامو عليكو00عاملين ايه دلوقتى؟00"راحت تسلم على الاب"
-يا سلام يا ختى رايحة تسلمى عليه هو الاول
-و انت مالك انت يا بارد واحدة و بتطمن على جوزها
-ما هو انا ابنها برضه و لا انت شايف غير كده؟
طبعا الجمهور مستنى الاب يقول للواد :"انت مش ابنى00انت لقيط00لقيط00لقيط" بس الاب مقالش كده
-بس يا واد انت منا جاية اسلم عليك اهو "قبل ما تمشى جوزها يشخط فيها"
-انتى يا ولية اقعدى هنا و اوعى تقربيله ده عيل قليل الادب
-معلش يا خويا ده زى ابنك برضه
-زى ابنه؟!00المخرج نزل تانى الموسيقى بتاعت انت لقيط00لقيط00لقيط"
-قصدى يعنى ابنك و ملكش غيره
-منا كمان ابوه و ملوش غيرى 000ثم انا عندى دستة فى البيت
-يعنى اولع بجاز انا يعنى و لا ايه ؟
-لا يا بنى ابوك ميقصدش
-لا اقصد بقى
-معلش يا خويا 00خلاص و النبى تهدى
يدخل الدكتور00
-فيه ايه يا مدام00ايه يا استاذ منك ليه00صوتكوا موصل آخر المستشفى
-معلش يا دكتور احنا متاسفين قوى اصلهم كده علطول
-اخرسى يا ولية00لما الرجالة يتكلموا صوتك ميطلعش
-متشخطش ف امى تانى انت فاهم
-بس يا ولا ده سيدى و تاج راسى و يشخط زى ما هو عايز
-ايوة كده خليكى عاقلة
-كفايااااااااااااااااااااااااااااااااااااااااااااااااااااااااااااااااااه "الدكتور جاتله هستيريا و طلع من الاوضة و هو بيرقص و يغنى:
"الواد كان عنده حق اوعى تقوليله لا"
الخميس، 3 أبريل 2008
الكحرتة الابدية(الجزء الثانى بعد الكحرتة)
-معلش انت الكبير برضه ده عيل و طايش
-اه و النبى طايش يا خويا
-بس يا ولية و روحى اعملى شاى للناس
-حاضر يا خويا
-ايه يا رجاله كنا بنقول ايه
-كنا بنقول انت الكبير
-لايونكن الواد ده يدخل البيت تانى "مع الاعتذار لمصطفى شعبان"
-معلش هو اكيد هييجى يبوس على راسك و ايدك كمان "ابقوا قابلونى"
-لو مكنتش تحلف بس "بيتلكك"
-لولولولولولولولولولوى
-خشى جوة يا ولية لحسن تحصلى ابنك
-حاضر يا خويا "محدش يسألنى هى ليه دايما بتقوله يا خويا لان ده خيال المؤلف"
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الواد شلضم صبى الميكانيكى راح يجيب بسلامته من عند جدته "تيته يعنى" عشان يرجعه لابوه و ده الحوار اللى حوره هو و سيكا ع الواد
-ترررررررررررررن تررررررررررررررررررررررررن
-ايوة يابنى مين ع الباب
-احنا اصحاب الواد يا تيته
-حادر يابنى سوانى و كايه "معلش اصل طقم السنان وقع"
-الواد هنا يا تيته ولا نزل مع البت سوسو؟
-لا متلقح جوة ع اللى اسمه ايه ده و الله منا عارفة هو بيعمل ايه
يدخلوا عليه فجأة زى الافلام الاجنبى
-بتعمل ايه ياض يلا قوم روح
-مش قايم الا اما ييجى هو يصالحنى
-ده ابوك برضه يابنى00شاور عقلك
-لا يا عم ده ضربنى
-معلش ده قاعد بيعيط من ساعتها مستنيك تروح
-خلاص00 خلاص 00انا موافق "عجبته بيعيط قوى"
*و ادوا الواد لابوه
الاثنين، 17 مارس 2008
الكحرتة الابدية(الجزء الاول بعد الكحرتة)
تررررررررررن -جرس الباب يا منيل قوم افتح بدل ما انت عامل زى الكرسى اللى انت قاعد عليه كده
-طيب..منا قايم اهه انتى مبتصبريش ابدا كنت بعمل داونلود
-والله منا فاهمة اى حاجة منك
تررررررررررررن "جرس الباب لسه بيرن"
-ايوة مين اللى بيخبط؟
-بيخبط مين يا ابن ال..... انت مش سامع الجرس!؟
-مين اللى بيرن الجرس........استريحتى!؟
"من برة" -انا ياهبل منك ليها افتح ياض
"من جوة" -ده بابا قومى افتحيله بسرعة"يهمس"لازم الحق اقفل النت"يدخل جوة بسرعة"
-ايوة حاضر جاية اهوه
-انتو اطرشتوا ولا ايه كل ده و مسمعتوش؟"شكله متنرفز قوى"
-معلش يا خويا اصل احنا كنا مشغولين شويه
-مشغولين فى ايه يا وليه وفين الواد ابنك انا لسه كنت سامع صوته
-دخل جوه يقفل اللى اسمه ايه ده اللى فتحه
-هوه ايه اللى فتحه ياوليه انتى
يخرج الابن من جوه-بابا؟..حمد الله على السلامه0 انت جيت؟!
-بس ياض يا مهووش انت إيه اللى امك بتقوله ده
-امى؟؟"يبص لها بصه اللى حس بالخيانه"قالت ايه امى
-هو ايه اللى انت كنت فاتحه ورحت تقفله ده
يبص ببلاهه -فاتحه؟! ورحت أقفله؟! -يبص لمامته تانى ويغمز لها من تحت لتحت-أأأ الشباك
-شباك؟؟ "طبعا ابوه مش مصدق"
-اه اصل الشباك كان جايب سقعه
-سقعه مين يا اهبل دانا هطلع من هدومى من الحر
-ماهو انا كنت طالع من هدومى و....... ملحقش يكمل الجمله عشان ابوه اداه قلم بس ايه رن فى صرصور ودنه
الابن برضه -ايه هو ده انت بتضربنى ليه؟
الاب طبعا -ناعام"بيشرشح"بضربك ليه لهو انت مش عارف ياروح ماما
-لأ مش عارف وبعدين مش من حقك تضربنى.. طبعا خد قلم كمان
-ورينى بقى هتعمل ايه.. هاتى الحزام ياوليه
الام بقى -معلش يا خويا هو مش هيعمل كده تانى..للابن..بوس راس ابوك
-مش بايس هو انا اللى ضربته ولا هو اللى ضربنى؟
يا ريت محدش يسألنى ع اللى حصل
السبت، 15 مارس 2008
الكحرتة الابدية (الجزء الاول قبل الكحرتة)
الاب: راجل موظف غلبان "هو اللي بيقول" بس المؤلف عرف من مصادر موثوق فيها انه بيتاجر فى الممنوع
الام:ست غلبانة امها و ابوها ضحكوا عليها و جوزوها واحد ولا سي السيد فى زمنه
الابن أو الواد: ده يبقى اول فرحهم آآآآآ قصدي اول همهم و ده بقى اللي بيخلص ابوه من ذنوب تجارة الممنوع
اهل الحارة:دول هيظهروا بصفتهم ولاد الحلال اللي بيصلحوا بين الراجل و ابنه كل مرة يتخانقوا فيها
شلضم:واحد من العيال الصايعين "ده تعبير الاب و المؤلف يخلى مسؤوليته" اللي الواد مصاحبهم و هو اللي بيجيب الواد من عند جدته كل مرة يسيب فيها البيت
سيكا:ده بقى الانتيخ بتاع الواد بس كل مرة يروح مع شلضم كمالة عدد "من ناحية يعمل منظر و من ناحية شلضم ميروحش لوحده"
*بما ان العد فى التقويم الكحروتى لسه مبدأش فانا أنصحكم تدخلوا على البوست ده كل سنة كحروتية عشان تعرفوا مين اتولد و مين مات و كده يعنى